一個人旅行有幾出奇

Faith is taking the first step even when you can’t see the whole staircase. - Martin Luther King

人生的意義會隨著人生經歷而變化. 人生變化有三種, 小變化, 大變化同無變化. 有啲似黃興桂添, 哈. 我的屬於大變化中的小變化. 而夢想有時會在失意時才去追尋, 奇妙的事情卻總在追夢時不斷發生.

早前回母親家吃飯, 我跟她說四月會同朋友去菲律賓, 五月會去歐洲流浪. 與我娘親熟識的親友都知呢個世界有幾危險, 大陸有毒食物, 日本有幅射, 美國有恐襲, 印度有強姦, 非洲有食人, 泰國有暴動. 當然菲律賓同歐洲都係黑名單, 除了天堂都應該冇咩地方可以去. 所以維珍開始有飛機去太空, 目的地梗係天堂啦. 

話時話, 我唔知大家點睇菲律賓, 有啲朋友跟我說最憎菲律賓(他們不是事件受害人), 好憎阿基諾三世, 所以一世都唔會去. 其實我都好好好憎阿基諾, 也不太喜歡菲律賓人. 因為上次去菲律賓旅行, 我也遇過很多不負責任的人. Everything say yes but no show. 但我生活上也遇到很多好嘅菲律賓人. 還記得我以前的鐘點在人質事件後跟我說對不起, 她說睇到新聞都哭了出來. 其實完全唔關佢事, 相對於一些冷漠的香港人她的真誠可令我很慚愧. 而且憎菲律賓人不需要憎菲律賓. 菲律賓只是一個地方, 人得罪你, 唔係個地方得罪你. 當你見識過菲律賓嘅海底世界, 你便會驚訝創造的奇妙, 會好後悔講過一世都什麼什麼的說話.

(Source: http://planetphilippines.com/wp-content/uploads/2010/01/corals-marine-life.jpg)

太多題外話了, 哈. 為什麼一個人旅行已經太多人講, 我唔想再重覆. 而我喜歡一班人去, 也同樣喜歡一個人去. 朋友啱期咪一齊, 唔啱期咪一個囉, 幾簡單. 

我今次已經不是第一次一個人去旅行. 數年前想放自己幾日假, 便一個人去了海南島. 非常寫意也非常hea, 每天都只是躺在沙灘看看書, 一條佬去海鮮市塲叫了一枱海鮮, 休哉遊哉, 快活過神仙. 不過, 幫我訂機票酒店的朋友問我細佬係咪有心事. 哈哈, 有心有心.
上年, 好友送我豉油(6天免費酒店coupon), 我就出隻雞(3千幾機票加幾千洗費)去咗轉布吉. 因為太多時間便報了初級潛水班, 立即麥當當上身I'm loving it. 喺香港點都剔唔起心機去學. 一來3千幾好似好貴, 二來要去西貢好似好遠. 襯去旅行, 洗錢鬆手啲. 

同埋一個人去酒吧街係會有啲好marvelous嘅事情發生. 你知道泰國咩最多㗎啦, 你去完會好想立即返香港驗眼, 究竟係鬥雞定係幻覺. 

布吉巴東酒吧街有數十間酒吧, 每間都有很多在跳光管舞的女郎, 我隨意揀了其一間酒吧. 有一些酒吧女郎熱情地走過來. 我不太習慣與他們?她們?溝通, 所以我都表現得很冷漠. 反而bartender見我飲悶酒, 撩我玩五子棋. 根據我在書本上對她們的認識, 有些一眼便能分辨, 有些特別漂亮也能歸納. 那位bartender不算美, 便像大家僱用的菲僱樣子一般. 聲音也沒特別尖銳或低沉, 所以很放心地玩吓棋傾吓計. 基於我喜歡尋求人類學奧秘的精神, 而且開始傾熟咗, 我便問她跳光管舞的是ladyboy還是real girl. 點知佢哈哈大笑話全部都係real girl. You're lier...我心諗. 跟住佢同我講其實佢係ladyboy...我差啲將口裡的啤酒噴出來. 我絕對沒有歧視, 只是太意外, 令我對她們有一番新見解, 原來歸納係冇公式架. 


一班朋友去你只會同朋友玩樂, 同女朋友去你嘅視線都只敢維持於零度, 條頸仲側過側田咁凝望住女友啲眼屎直到離開, 同家人直情唔會去啦, 怕嚇親令壽堂. 點解架巴士冇人讓座嘅? 咁多人扶住條柱仲話唔係巴士, 衰仔蝦我未搭過泰國巴士呀? 所以呢啲咁marvelous嘅經歷我相信只有一個人去才會發生, 真係好有趣好難忘.